المهندس

أخيرا،خلصت امتحانات الفينال(طبعا لسة مش زابطة معي باالانجليزي)،بعد ضغط و هم كبير، دايما قلقان مشان امتحان بكرة، وبتوكل هم الامتحان اللي بعد بكرة،و اللي بعد بعد بكرة، و طبعا اللي بعد بعد بعد بكرة،و المشكلة انوا اللي بسمع بفزع(ما هي كل العلامات مبينة،بال 50 و 60 ، و اذا شنصت معك و كانت أمك داعييتلك بال70 ،طبعا اذا ما كنت راسب بمادة على احسن الأحوال).

كنت كل ما أرجع من امتحان ، تسألني جدتي: آه يا عمرو،(فودست) الجامعة و الا لسة؟؟ طبعا أول مرة ما فهمت عليها،لأني أول مرة بسمع كلمة (فودست)،و لما اعرفت انوا معناها (خلصت)،صرت أفهم جدتي عالطاير،و لما خلصت آخر امتحان،رجعت على البيت، فبقول لجدتي:اليوم يا جدة فودسنا.

جدتي:آه، كيف الامتحان انشا الله زبطت؟؟

أنا:الحمد لله انشا الله خير

جدتي: انشا الله ، انشا الله، مشان بكرة تصحى الصبح تجيب أغراض للبيت ، منا و منا ومنا و منا………..

(طبعا انت لما تخلص آخر امتحان،بتحكي لحالك اليوم بدي أسهر، بكرة بدي انام طول اليوم،و بدي أسوي و بدي أقطع ،و بدي أعمل و بدي و بدي و بدي، و البديّات كثيرة،طبعا و لا بتسوي اشي،بس بتكون بتعد أيام للفصل الجاي،و بتصير تونس بحالك:انشا الله الفصل الجاي بدي أشد حالي مزبوط،بكفي عاد، بيجي الفصل الجاي و اللي وراه واللي وراه،و العلامات هيه هيه(و طبعا اذا ما كانت أقل).

على كل، انشا الله الفصل الجاي يكون أحسن من الفصل هاد، الي و الكوا.

آميت يا رب العالمين.

هادا الأسبوع ما في مدونة فيديو، ليييييييييييييييييييش؟؟ما هيّ مبينه، لأنوا ادخلنا على امتحانات ال (الفينال)(بيني و بينكوا، مش عارف كيف بدي أكتب الكلمة بالانجليزي، مش راضية تزبط معي، لما أكتبها ما بتطلع في المكان المناسب).يوم الأربعاء بلشت أول امتحان (طبعا قبليه بيومين كان عندي فينال لاب، و قبليها بأسبوع كان عندي فاينلين لاب)، و لسوا الخير لقدام انشا الله،(يا عمي ما انت هندسة، اتعبلك شوي)، لما ييجي الامتحان 51 دائرة(دائرة بونص!!!!!)،و بتلاقيه كل دائرة 5 خيارات(في امتحانات لكل دائره 8 خيارات، و طبعا آخر دائرة بتكون لا شيء مما ذكر)، و كل خيار سطرين، انشا الله بتجيبوا صح.يا اخوان، ما بتوصل الدائرة 40 الا راسك مستوي من التعب، لو الأجوبة قدامك ما بتعرف تنقلها.على كل ، بالتوفيق لكل الناس اللي عندهم امتحانات،و بتمنا انوا كلهم يزبطوا.

لما تلاقيك قاعد مع الشباب في الجامعة،و تنفتح سيرة شاب معين، بتلاقي كل الشباب نزلت فيه، ما خلولوا(زنخ،ولا حدا بطيقوا، و الله ما بعرف كيف طايق حاله،عشوا شايف حاله؟؟؟؟)، حتى اذا نفس الشب اجا قعد مع الشباب،بتلاقيهم ما بصدقوا حتى يقوم من القعدة، و اذا طول، بتلاقيهم بفلوا واحد ورا الثاني، و مرات بتلاقيهم بلمحولوا، على الله يفهم و يقوم لحاله.بس من جهة ثانية،بتلاقي شاب ثاني ، كل الشباب بتحبوا،بكيفوا لما يقعدوا معاه، بتكون قعدته كثير حلوة،و اذا غاب بتلاقي الشباب بذكروه بالخير.لو جبت طرف محايد، و قعدته مع الطرفين، راح يحب الشاب المحبوب، و يكره الشاب المكروه،ليش؟؟الشاب المحبوب، بتلاقيه عارف كيف بدوا يتعامل مع الناس،أسلوبه حلو،مجاملاته حلوة،بتلاقي الكلام اللي بحكيه موزون،مزحوا خفيف.أما الشاب المكروه ،بتلاقيه برمي الكلام رمي،ما عندوا أسلوي بالحكي،مزحوا ثقيل، و غيروا من التصرفات اللي ما حدا بطيقها.لا تحكيلي انوا الشاب المكروه ، ما بلاحظ انوا الناس ما بطيقوا،أو بسمعلوا كلمه من هون و من هون(كل واحد عارف حاله)نصيحة: أي شخص بحب يغير شخصيته للأحسن، يحاول يقرأ كتاب (استمتع يحياتك) للشيخ محمد بن عبد الله العريفي، فيه أمثلة كتير حلوة و مقارنات رائعة بين الناس علة مختلف شخصياتهم، بتخللها مواقف من سيرة الحبيب المصطفى (صلى الله عليه و سلم)،و كيف قدر يكسب قلوب الناس، على مختلف شخصياتهم.(اللي بقدر يتصفحوا ما يقصر،وانشا الله تستفيدوا منوا)

1- دايما مشغول “رايح جاي .. رايح جاي” .

2 – معظم الاحتفالات إلي في الجامعة ما بيحضرها.

3- طبعا لما يفكر انوا فضي اشوي .. بطلعلوا شغل من غامض علمو ..امتحان مختبر..كويز.. هوموورك.. مشروع تخرج…

4 – دايما بلعن اليوم الي دخل فيه هندسة (مش لو درست اقتصاد أحسن)؟!

5- دايما مهموم (متى بدي أبلش دراسة؟؟ متى بدي أجهز تقارير المختبرات وأسلمهن؟؟ من مين بدي آخذهن (أغشهن)؟!!

6- محسود من قبل الآخرين(يا عمي إنت بتدرس هندسة ما شاء الله عليك!! بكرة أول ما بتتخرج الوظيفة بتستناك!!)….”يا عمي والله ما بتعرفوا البير وغطاه!!!

ملاحظة :طبعا أنا كنت ناوي أعمل لقاء فيديو مع طلاب من الهندسة ، وأخليهم يشرحوا عن همومهم (بس يا عمي والله ما في وقت!!!!!!!!)

و أخيرا، انتهى هذا الأسبوع.

كم كان طويلا في أيامه و ساعاته،ما بعرف شو السبب ، هل هي امتحانات الجامعة، اللي الواحد ما بصدق على الله متى و هي خلصانه(طبعا لأنوا امتحانك بكون يوم الخميس ، من الساعة 5-6 ، و بظلك ماكل هموا طول الأسبوع، و لا بتقدر تساوي اشي،زي كأنك بتحكي لحالك يارب ييجي الامتحان و أخلص)، و اللا الجو التعيس اللي كان في بداية الأسبوع، لا لواحد بقدر يدرس فيه من كآبته،و لا بقدر يطلع فيه(لأنوا بيني و بينكوا،الواحد بخاف يطير من الهوا، خلاف الغبرة اللي بتسد خشمك)،و الا لأنوا الواحد بطل يحس بالأيام ، عشان الروتين الممل اللي بتكرر كل أسبوع.

بتعرفوا، و الله الواحد من كثر ما عليه شغل، ما بعرف بشو بدو يبلش، و بظل يحكي لحاله بكرة و بعد بكرة، تا يمر الأسبوع و هو مش مساوي اشي(كثير بتصير معي الحالة هاي).

مع بداية الأسبوع الجديد(ظلوا  ساعتين و 55 دقيقة مشا يبدا)، بتمنى انوا يكون أحلى من الأسبوع اللي فات(اللي ظلوا ساعتين و55 دقيقة مشان يخلص)، انشا الله يكون أسبوع كويس بكل اللي فيه.

(آمين يا رب العالمين).